購買同付款
有咩付款方式？
全部價錢定價。香港／中國內地客戶經 KPay 支付（FPS、PayMe、支付寶、微信支付、Visa／Mastercard）；其他地區客戶經 Stripe 以國際信用卡付款，全球卡都收，銀行按匯率自動兌換。卡號同付款資料由 KPay／Stripe 直接處理，唔會經過我哋個站。
價錢仲有冇其他收費？
冇。網頁顯示嗰個港幣價錢就係最終收費，冇服務費、冇匯率手續費。實體 SIM 卡香港本地郵寄亦都免郵費。
可唔可以一次買幾張？
可以，落單表格入面可以揀數量。每張都係獨立一張卡（eSIM 每張有自己嘅 QR Code），可以分俾同行嘅人。
買咗之後喺邊度睇訂單？
付款成功會轉去你嘅訂單頁，同時電郵一份訂單連結俾你。用嗰條連結隨時可以返去睇狀態同 QR Code，唔使開戶口。
eSIM 開通同安裝
eSIM 幾時開通？
付款成功後系統即刻自動向供應商開卡，正常 30 秒內完成。QR Code 會顯示喺訂單頁，同時發送到你嘅電郵。
點解等咗仲未收到 QR Code？
供應商臨時斷線嘅時候開卡會失敗，系統會自動重試，同時通知本地團隊人手跟進。你可以隨時 refresh 訂單頁睇狀態。等超過 10 分鐘仲係未開到，請 WhatsApp 5745 9845 搵我哋。
我部手機支唔支援 eSIM？
撥號介面輸入 *#06#，見到 EID 呢一欄就代表支援。iPhone XS／XR 或之後、Samsung Galaxy S20 或之後、Google Pixel 3 或之後大部分都支援。詳細對照見「支援裝置」版。
QR Code 可以掃幾多次？
一般只可以掃描一次。裝好之後唔好刪除該 eSIM 設定檔，刪咗就用唔返，要重新購買。
應該幾時裝？
建議喺香港有 Wi-Fi 嘅時候先裝好。安裝唔會即刻開始計日數，日數係由首次連上當地網絡嗰日先計。落地先裝而又冇網絡，就會陷入「要有網先裝到」嘅死結。
裝咗但上唔到網點算？
九成係「數據漫遊」未開。去設定 → 流動網絡 → 揀返嗰個 eSIM → 開啟「數據漫遊」，再重新開機。仲唔得就喺網絡選擇入面手動揀返方案標明嗰個當地電訊商。
用緊旅遊 eSIM，香港號碼仲收唔收到 WhatsApp 同銀行 OTP？
收到。雙卡設定之下香港嗰張 SIM 保持啟用（但閂咗佢嘅「數據漫遊」，數據行旅遊 eSIM），香港號碼照收 SMS，銀行 OTP 一樣入到。WhatsApp 綁號碼唔綁 SIM，用旅遊數據照用。接收 SMS 一般唔收費，實際以你香港電訊商嘅收費為準。
返到香港要唔要刪咗個 eSIM？
方案完咗嗰個 eSIM 就冇作用，刪唔刪都得——留喺度唔會收費。想慳位可以刪，但刪咗冇得還原，過期方案亦唔可以翻用。部分品牌嘅卡支援增值延用，想留返增值可以去「我的 SIM 卡」睇下你張卡得唔得。
一家人買咗幾張 eSIM，QR Code 點分俾唔同人？
每張 eSIM 有自己獨立嘅 QR Code，一個 QR 只可以裝落一部機。全部 QR 都喺訂單頁同確認電郵入面，可以將訂單連結傳俾家人，各自用自己部機掃自己嗰個。⚠️ 唔好兩部機掃同一個 QR——第二部會裝唔到。
方案同數據
「每日 1GB」同「總量 10GB」有咩分別？
每日型每日俾你一個定額，用完當日會降速，第二日自動回滿，適合日日都要用、行程較長。總流量型係成個行程共用一個池，你可以某日用多啲某日用少啲，用完就要另買。
「無限」係咪真係全程全速？
唔係。市面上絕大部分「無限」方案都係「首 X GB 全速，其後降速（通常 128kbps–384kbps）繼續無限使用」。我哋喺方案說明入面照實寫，購買前請睇清楚。
日數點計？
由 SIM／eSIM 首次連上當地網絡嗰日起計，唔係購買日、亦唔係安裝日。所以提早買定、提早裝好都唔會蝕日數。
可唔可以分享熱點？
大部分方案支援熱點分享，可以同同行嘅人一齊用。少數方案唔支援，以個別方案說明為準。
有冇本地電話號碼？可唔可以打電話？
絕大部分旅遊方案係純數據卡，冇本地號碼、唔包通話同短訊。WhatsApp、Signal、FaceTime 等網絡通訊照用。少數號碼卡方案會有號碼，方案說明會寫明。
一張卡可唔可以用喺幾個國家？
可以，多國方案（例如歐洲卡、東南亞卡）一張就跨國通用，唔使換卡。方案卡上面嘅「適用地區」會列晒覆蓋國家。
去 5 日旅行大約要幾多 GB？
淨係用訊息、地圖同瀏覽網頁，一日大約 500MB–1GB；成日影相上載、碌社交媒體，一日 1–2GB；經常睇片就要 2GB 以上一日。5 日行程輕用大約 3–5GB 夠，唔肯定可以用我哋個「數據用量計算器」按你嘅習慣估一次。
行程去兩三個國家，買單國卡定多國卡？
淨係去一個國家，單國卡通常最平。行程跨兩三個國家（例如日韓、歐洲多國），揀多國方案一張卡通用唔使換，慳返每個國家買一張嘅麻煩。多國方案嘅「適用地區」會列晒覆蓋邊啲國家，買前對一對你嘅行程。
中國內地方案使唔使另外裝 VPN？
旅遊卡係漫遊型方案，數據經境外網關出口，一般可以直接用 Google、WhatsApp、Instagram 呢啲服務，唔使另外裝 VPN。個別方案嘅實際行為以方案說明為準；使用時請遵守當地法律法規。
降速之後 128kbps 仲做唔做到嘢？
128kbps–384kbps 之下：WhatsApp 文字訊息、收發 email 仲用到；地圖載入會慢；睇相同社交媒體好慢；影片基本上唔使旨意。降速係「應急保底」，唔係正常使用速度——估唔準用量就揀大啲嘅方案或者每日型。
買咗未用，可唔可以下次旅行先用？
未啟用係唔會計日數嘅（日數由首次連網嗰日起計），但每個方案有自己嘅「啟用限期」，喺方案卡同訂單頁都有寫，過咗期仲未啟用就會作廢。買定唔使急住裝，但要留意個限期夠唔夠你下次行程。
實體 SIM 卡
實體卡幾耐寄到？
付款後我哋安排香港本地郵寄（免郵費），寄出後你會收到附追蹤編號嘅電郵，一般 1–3 個工作天寄到。
可唔可以寄去香港以外？
暫時只寄香港本地地址。海外收件請改揀 eSIM。
趕住出發，實體卡趕唔切點算？
揀 eSIM，付款後即時開通，唔使等寄。如果部機唔支援 eSIM 而又趕時間，請 WhatsApp 5745 9845 同我哋商量。
訂單同售後
訂單有問題點算？
隨時用訂單連結睇狀態。開通遇到問題，我哋系統會自動通知本地團隊人手跟進。想即刻搵人：WhatsApp 5745 9845 或電郵 [email protected]。
可唔可以退款？
eSIM 一經開通（已經向供應商佔用咗一張卡）恕不退款。實體卡未寄出前可以取消，已寄出恕不退貨。買錯咗請即刻 WhatsApp 5745 9845 搵我哋，未開卡未寄出仲有得救。
買錯咗目的地／日數可唔可以改？
eSIM 開通之後改唔到。落單前請確認清楚目的地、日數同裝置兼容性；有疑問可以先 WhatsApp 問我哋。