日本嘅網絡環境
日本主要流動網絡商係 NTT docomo、KDDI au、SoftBank 同樂天モバイル。旅遊上網卡一般會行返其中一個嘅網絡，方案卡上面會標明。
東京、大阪、京都、名古屋、福岡等主要城市同新幹線沿線 5G 覆蓋成熟；北海道、東北、山區同離島以 4G LTE 為主，日常導航同通訊足夠。地鐵站內普遍有訊號。
揀網絡有冇分別？
喺主要城市，三大網絡日常使用嘅差異唔大。要留意嘅係郊區同山區 —— 傳統上 docomo 喺鄉郊嘅基站密度較高，樂天嘅自建網絡覆蓋則相對集中喺城市（郊區靠漫遊）。
如果你嘅行程主要喺城市同新幹線沿線，唔使太揀網絡；如果會入白川鄉、上高地、屋久島呢類地方，就留意方案標明行邊個網。
日數點對應
- 日數由首次連上日本網絡嗰日起計，唔係購買日。所以提早買定、提早裝好，完全唔會蝕。
- 買長一日做緩衝。凌晨機、延誤、改行程都會令實際使用日數比你估嘅多一日。
- 分開兩程去（例如中間返香港）就要留意：日數係連續計，唔會暫停。
幾多 GB 先夠？
日本自由行對數據嘅需求，主要落喺三樣嘢：Google Maps 導航、乘換案內查車、同埋影相上傳。
- 純觀光、唔點睇片 → 每日 1GB 好夠。
- 成日開直播／上載影片／視像通話 → 每日 2–3GB 或以上。
- 一家幾口靠一部機開熱點 → 直接乘返人數，或者考慮多買一兩張卡。
- 慳法：出發前喺 Google Maps 落定東京／大阪嘅離線地圖。
eSIM 定實體卡？
部機支援 eSIM（撥 *#06# 見到 EID）就揀 eSIM —— 付款後即時開通，唔使等寄，亦唔會有「卡未到但要出發」嘅風險。
部機唔支援（例如中國大陸版 iPhone）、或者想借畀屋企人部舊機用，就揀實體 SIM 卡，我哋香港本地郵寄，一般 1–3 個工作天到。記住預返時間。
落地之後最常見嘅問題
- 上唔到網 → 九成係「數據漫遊」未開。設定 → 流動網絡 → 揀返嗰個 eSIM → 開啟數據漫遊。
- 訊號得一兩格 → 喺網絡選擇度手動揀返方案標明嗰個網絡（例如 SoftBank）。
- 用得好慢 → 睇下係咪已經用爆咗當日額度而降咗速；每日定量方案第二日凌晨會自動回滿。
